 |
 |
 |
 |
| |
|
|||||
|
||||||
|
Qoraaga hal-abuurka ah Cabdillaahi Cawed Cige, ayaa dhawr sannadood ka hor maanso uu tiriyey ay tuducyadani ka mid ahaayeen, isaga oo ka uurkutaalloonaya sida foosha xun ee Xamar dadku ugu le’anayaan sida duqsiga iyo sida dirirta sokeeye ugu tafadheeraatay dadka degaankaas ku dhaqan: Dhagaxoo ilmeeyiyo Dadka oohini way ka dhammaatay oo dharaar kastaba waa u dil, dagaal, qax, qaxar iyo mayd la sii sido; qof xabbadi galaafatay, mid miino qaadatay, qof darxumo kale iyo macaluuli halaagtey, iyo dhabannahaysta waayadan dambe caanbaxaysa ee qof miidaamo dhega la’ ahi qofaf kale jiscimanayo, una qoonsanayo noloshooda! Tan xanuunka iyo xanafta badan leh baa u dambaysey. Waa maydkan raabe raabaha isu dulsaaran! Dhiiggan kutubta iyo digriiyada aqooneed ka dhex galacleeyey. Meesha wax ka dhaceen waa rug aqooneed. Arday ka qalinjebinaysey kulliyad caafimaad ayaa munaasibaddan lagu hoobtay lahaa. Dabcan dadka ku le’day ee sida aan kala sooca lahayn ee nacweynida ah loogu gumaaday waa in ehel u ahayd aqoonta, tacliinta; waxbarashada! Waa ardaydii ummadda dunsan ee dhusinka hoose u sii degaysa tobannaanka sannadood wax u soo baranaysey, weliba halkii ugu nuglayd ku foognayd ee qalmaanta u qaadatay. Ubaxii afka soo kala qaadayey, hibooyinkii ibo furanayey; dhakhaatiirtii soo baxday. Waa macallimiintii caafimaadka iyo dhakhtarnimada macduunka ah ardayda ku habaysey cilmi ahaan. Waa ehelkii iyo qaraabadii aqoonta. Waa dugsiyadii garashada iyo iftiinka. Waa mas’uuliyiintii Waxbarashada, Hiddaha iyo Tacliinta iyo kuwii Caafimaadka! Waa birmageyadii ummadda tabaalaysan ee dabargo’eedu sida tusbaxa u furmay. Waa naqwadii ummaddan sii goblamaysa ee oodo dhacameedyadu u sii kala rogmayaan. Ubaxiinni waa daadiseen, waana dubateene Dhakhaatiirka iyo ardayda Xamar dhiiggoodu wadhan yahay waa ifafaale samadawdarnimo oo ku biiray abtirsiinyo ahaan foolxumooyinkii ka horreeyey ee waayadii dambe waddanka ka dhisaalnaa, magaalada Muqdishona sida dhiiftoon uga hanaqaadayey. Waa in la baadhaa ciddii ka dambaysey falkaas arxandarradu ka buuxdo oo dhan laga wada noqdaa. Cidda dhiilladaas horseedka ka ahi waa isirro halis ku ah jiritaanka dadnimo; ummadnimo; xoog dibadeed iyo mid gudeed kii uu noqdaba. Taas baana hoosta ka xarriqaysa in aan la dhayalsan qaawinta iyo kashifaaddeeda. Dhakhaatiirka, macallimiinta, culimada, cuqaasha, aqoonyahannada, carruurta, haweenka iyo dadka la mid ahi waa birmageydo ka caaggan in loo aaneeyo oo lagu dhex milo isdiiddooyinka iyo khilaafyada kooxo gaar ah u dhexeeya, ciddii arrintaas indhaha ka lalisaana waa cid la falgashan oo ku hiranaysa aragti caabuq ka buuxo oo jiidanaysa warmo iyo gantaallo sun iyo waabeeyo daxalaysan afka ku sita! Baaruudda huguntee Maxamed Baashe X. Xasan We welcome the submission of all articles for possible publication on WardheerNews.com |
