Afarraydan gaaban waxaan tiriyey December 2008, ka dib markii aan akhriyey qoraal uu khabiirka magaca weyne ee Soomaaliyeed, Prof. Siciid Qaadi Samater, ku daabacay WardheerNews, kana sameeyey taariikhdii Prof. Goosh. Qoraalkaasuu Siciid ku soo gabagabeeyey erayo maanso ah. Siciid tariikhdiisa si fican baan u hayey, una xiiseyn jirey qoraaladiisa, waayo anigoo ah nin reer Qalaafe ahaa, markii danbana Reer Ceelberde, Qaadi Samatarna (Siciid Aabihii) wuxuu ahaa Qaadigii labada magaalaba. Hase yeeshee ma ogeyn in Siciid gabyo. Waxaan marka goostay inaan affaraydan u diro Prof. Siciid, si aan ugu muujiyo sidaan uga helay qoraalkiisa iyo inaan jaahil ka ahaa gabayaanimadiisa.

1. Qalin Maal Siciidow inaad tahay,       Qoraa taagtay
2. Qallaafiyo qixii Ceelberdiyo,             Qaranki Soomaali
3. Qurbihiyo wixii aad qarnigan,            hawlo soo qabatay
4. Qaab-dhaqanka Soomaalidiyo,           qubane taariikhda
5. Waxaad qeexday buugtaad qortee,    Qaaradaha gaadhey
6. Quwaddaa ilaah kugu ladhiyo,           qirada maankaaga
7. Qisadaadu waa igu dhamayd,             qayb kastoy tahaye
8. Inaad gabayga qodobeyn kartaa,        iga qarsooneyde

9. Qoraalkiisi Goosh sheekadaa,             quruxsaneed qayddey
10. Qaybrabnimadi wiil Polishoo, ............. qarar ka laadlaadey
11. Inuu qaatey qalinkii murtida,               qolada Soomaali
12. Xikmadaa ku qoofadhan sidaad,        daaha uga qaaddey
13. U qushuucey qiimaha ku jira,              qodobadaadiiye

14. Quwadaha shisheeyuhu inayn,           qaadan degankeena
15. Qaraxiyo qac iyo weerarkii,                gaalo lagu qaadey
16. Qoorti Koofil laga gooyey iyo,           qooqa libinteedi
17. Qisaastiisa sida loo qayaxay,              gabayo qaarkooda
18. Qabki waayadaa nagu jiriyo,              qaran jaceylkeyni
19. Soo qaadki waa quud naftuu,             qiiro galiyaaye

20. Qorshihii Daraawiishta iyo,                qaaidka horseedey
21. Sayid Maxamed qaadhkiyo ridada,    duullanka u qaydan
22. Qasdigiisa iyo maansaduu ,                yoolka ugu qeexay
23. Isku qabadka labadaa qofeen,                        qurub walaaleynin
24. Qaadaa-dhiggaagii ka helay,               waa mid sii qodane

25. Rabbi nagama qaadee nimaan,            qaayib naad tahaye
26. Qarxi gabayga waayadan qabilan,      mudan cid qeexdaaye
27. Qoon aniga oo kale ahoo qaban,         waxaad sheekto
28. Oo kugu qaddarin baa jiree soo qub,  waxaad hayso

Abwaan Xuseen Cabdi Xalane
Email: hhalane@hotmail.com

__________________________________________________________________________

We welcome the submission of all articles for possible publication on WardheerNews.com So please email your article today Opinions expressed in this article are those of the author and do not necessarily reflect the views of WardheerNews
Maqaalkani wuxuu ka turjumayaa aragtida Qoraaga loomana fasiran karo tan WardheerNews 

Copyright © 2008 Wardheernews.com