Tixdan mgaceeda la yidhaahdo Ha Deydayina waxay la bah tahay gabayadii iyo silsiladii dhex martay abwaanada kala ah Xuseen Cabdi Xalane oo jooga Suudaan, Maxamed Hirad (Xagar) oo San Diego deggen iyo iyo walaal Mubashir Shiikh Cabdulaahi oo ku nool dalka Ingiriiska. Waxa ay tixdu dhinaceeda ka soo bandhigaysaa badheedhaha  ay tixihii hore wax ka taabteen ee ku aadanaa Dawladnimo Soomaaliyeed iyo sida ay u durugtay maanta. Gabaygiina waa kan:

1. Ma dayoco Ilaahay qofkaan,  daallinka ahayne
2. Dariiqiisa ruuxii maraa,  loo dawaray khayre
3. Dabkuna kama bakhtiyo ruuxii,  aan daa'im caasiyine
4. Markaan dabar la'aan soofnay buu,  daad nasoo galaye
5. Deyowgiyo waxaa noogu wacan,  daalka hadhi waayey

6. Duflaalkani wuxuu inagu dhacay,  ama na daanduunshey
7. Dayuus iyo markii aan ibleys,  daba gallee raacnay
8. Markii duubka loo xidhay kuwii,  dunida aafeeyey
9. Daa'inkeen markaan caasinee,  diidnay amarkiisa

10. Dadqalliyo markii aan shuftada,  daabadda u dhiibney
11. Dilaayada dadkii madhiy iyo,  daydaygiyo tuugta
12. Dad qaadkiyo waraabaha markaan,  dila odhan weyney
13. Deldelaadda nimankii mudnaa,  deyiba maysaane

14. Derejada waxaa lagu helaa,  daabax iyo dhiige
15. Dulmigiyo markaad qaayibteen,  doofil shaqadiisa
16. Dulliga maalintaan qaadannee,  diidnay odhan weyney
17. Daaquudadaa waashay iyo,  dibin dowgaa miidhan

18. Doqonka maata dooxaa markay,  cidi durrayn weydey
19. Dijaallada markaan daba galliyo,  dawdarkiyo tuugta
20. Markii aan durbaanka u tuniyo, daramalkii heesta
21. Markii aan iyaga doorannoo,  daacad u ahaannay

22. Dembigaa arliga buuxshey baa,  loogu daw galaye
23. Dibowday oo danteennii luntoo,  dooxay bahal fiide
24. Dabcigaa haddaynaan bedelin,  dunidu ay yaabtay
25. Ha deydeyina inaan dawladnimo,  dib u haleellaaye

26. Dariiqii wacnaa iyo markii,  dawgii laga leexday
27. Diin iyo ku dhaqankeed markii , daaqad laga tuuray
28. Musxafkii Ilaah soo dejee,  daahirka ahaaday
29. Dastuurkii Ilaahay markii,  doodda laga keenay

30. Dureyga iyo duumadatan,  aan daawada  u weyney
31. Diiftaa jidhkaygiyo ku taal iyo,  diilintiyo qoonta
32. Dubaaqada nafteeniyo waxaa,  nabarra duugoobey
33. Dingaraaradaa nagu dhacdiyo,  doogta hadhi weydey

34. Dakharada dhafoorkayga iyo,  daawo madaxayga
35. Duluglaha qaxootiga dadkaa,  debedda meeraaya
36. Dewersiga shisheeyaha kuwaa,  daasadda u qaatay
37. Debedda iyo gudahaba dadkaa,  doolarka u waashay

38. Dembigaa arliga buuxshey baa,  loogu daw galaye
39. Dibowday oo danteenii luntoo,  dooxay bahal  fiide
40. Dabcigaa haddaynaan bedelin,  dunidu ay yaabtay
41. Ha deydeyina inaan dawladnimo,  dibu haleellaaye

42. Daboolkaa qalbiga fuulay iyo,  raanka dedey laabta
43. Dunuub weeye Soomaaliyeey , daaha saaraniye
44. Waxkastoo Ilaahay ka digay, amase noo diidey
45. Dembiyadii fircoon lagu rogaan,  dabada haynnaaye

46. Diihaalka iyo oonkiyo,  awda dami weydey
47. Diraacda iyo jiilaalkan,  aan lagaba doogaynin
48. Abaarahan is daba joogsadiyo,  diriradaa baaqday
49. Ciiradan dhulkii lagu dediyo,  roobkan di'i waayey
50. Daba qawda iyo foorahaa,  inagu soo daacay

51. Daruuruhu haddii ay curtaan,  daaq ma bixiyaane
52. Darar malaha iyo xoolihii , doobi caana ahe
53. Duunyadan manfaca beeshay waa,  wax iga diimoone
54. Daxalkaa qalbiga fuulay iyo,  damaca maaroobey

55. Dembigaa arliga buuxshey baa,  loogu dawgalaye
56. Dibowdayoo danteennii luntoo,  dooxay bahal  fiide
57. Dabcigaa haddaynaan bedelin,  dunidu ay yaabtay
58. Ha deydeyina inaan dawladnimo,  dibu haleellaaye

59. Maankeenna waxa dooriyee , inna dabayl raacshey
60. Ku digrinay qabiil iyo wixii,  dilay awowgeene
61. Dib waxaa inoo dhigay tola'ay,  aan dugsi lahayne
62. Hallays daayo weligay ma'maqal,  dirira mooyaane
63. Wax naloogu daabacay qalbiga,  daafac reeraha'e

64. Daacuun qabyaaladi ka daran,  laysu soo diro'e
65. Reer hebel intuu daadka yahay,  duurka iyo maadha
66. Intuu dunida kelidiisa yahay,  kan ugu doorrooni
67. Dadka kale intuu duudka yahay,  doonni yari qaado
68. Degi mayso Soomaaliyoo,  way is dilaysaaye

69. Dibowday oo danteennii luntoo,  dooxay bahal  fiide
70. Dabciga haddaynaan bedelin,  dunidu ay yaabtay
71. Ha deydeyina inaad dawladnimo,  dibu haleeshaane

W/C Hurre Axmed
Emai:hurreaxmed@yahoo.co.uk

_____________________________________________________________________________

We welcome the submission of all articles for possible publication on WardheerNews.com So please email your article today Opinions expressed in this article are those of the author and do not necessarily reflect the views of WardheerNews
Maqaalkani wuxuu ka turjumayaa aragtida Qoraaga loomana fasiran karo tan WardheerNews 

Copyright © 2009 Wardheernews.com