Sawrac
W/T Faarax Gamuute
Feb. 15, 2011
|
Waan idinka soo sheeka dhaafaye, Bir-magayno, ugub Soomaaliyeed oo laga gardaraaday, anna aan meesha taagnahay waxse aanan u tari karin ayay ka curatay. Taasu shalay. Tu kalana daad-xoorta ugu kaalay. Waagii beryaaba waaya lehe, nin baa laga hayaa:
“Allay lehe inteedaan ku sugay, aradka Gaaroodi!”
Nin kalana,"Hashaydii wad baa dilay. Waxna waa u wehesheen" ayaa laga reebay. Waa sida, oo hadal lama sudhnaadee:
Markaan sanqaroorka dhawray
Sartiyo jaaheeda dheehday
Yartaan samaydeeda toosan
Is idhi Soomaali weeye
Markii ‘Suu’(1) loogu yeedhay
Saliilyaa laygu rooray
Inay tala iga sabooshay
waxaan laba, laba dul saaray
Midaan la sugayn iskeenye
Salaan gacal baan u taagay
Sindadabkay ii jaleecday
Saluug baa iiga muuqday
Danniga suuraan u qaatay
Ku idhi ‘Taa kaama siisan’
Intay sakatiday cabbaar yar
I tidhi ‘saad moodday maaha
Hortaa bay timi su’aashu
Jawaabtuna way sugnayde
Dar baa ku sangaagurooday
Siyaala kalana u dheegtay
Sangaabta warkaygu haatan
Sugaal baa aabbahaya
Sareedaa hooyadaya
Intaan dhulku nala sabbaynin
Sureer baa lay yaqaannay
Inaan sammigayga doorsho
Sinjiga guudeen wadaagno
Dartood uga sawrac guuro
Wixii sababteeda keenay
Inaan saafaan jeclaaye
Wakhtiga yaan igu simaynin
Sidaasoy tahay cir sooryo
Dhawaan la siraadan doona
Sansaankaa laga gartaaye
Waxgarad waa loo saraaye
Anoon sarrifaad galaynin
Haddaan kuu yara sargooyo
Sanqadhahay kala taqaanno
Sagaaraba way diddaaye
Markii laga siibay dhaadmo
Ayaan Soomaali daayay.
Markii laga tegay samaanta
Salkana loo muday xumaanta
Satiga loo sii ballaadhshay
Ayaan Soomaali daayay.
Kolkuu helo kadin u saydhmay
Tabtuu weeruhu sameeyo
Markay dhaqan kala sinnaatay
Ayaan Soomaali daayay.
Sidii saarrayda beenta
Markii loo lulay sakaarka
Runtana loo jiiday suunka
Ayaan Soomaali daayay.
Hubsiino ninkeed sagaal jir
Irmaan awgeed u saarye
Markuu damaceed ka suulay
Ayaan Soomaali daayay.
Ninkii xadhig lama sitaana
Inaan soofuhu bir waayin
Markii lagu siiyay gaaddo
Ayaan Soomaali daayay.
Sicii dhiin soor sidaasa
Markuu Suul-cayn dhegtooda
Dagee seeraha ka qaytay
Ayaan Soomaali daayay.
Waxaan garashada solaynin
Markii laga dayay siyaasad
Hadh galay suuq lala istaagay
Ayaan Soomaali daayay.
Sarriigo ninkaan aqoonin
Markii sacab loogu guuxay
Duntii lagu xidhay suldaanka
Ayaan Soomaali daayay.
Qof go’ay waa laga samraaye
Markay suruc, suruc tallaalan
La timi suurow darraanta
Ayaan Soomaali daayay.
Gammuute
E-Mail: farahgamute@gmail.com
_____________________________________________________________________
We welcome the submission of all articles for possible publication on WardheerNews.com
So please email your article today Opinions expressed in this article are those of the author
and do not necessarily reflect the views of WardheerNews
Maqaalkani wuxuu ka turjumayaa aragtida Qoraaga loomana fasiran karo tan WardheerNews
 Copyright © 2011 WardheerNews.com
|
