Garnaqsi

Tixdan gabanka ah waxaan rabaa inaan kaga faalloodu waxyaaba badan oo waqtigan la joogo ka dhaca dalka Soomaalida.  Run ahaantii waxaa u sabab ah dadka oo ay ka luntay dhaqamadii hore loogu yiqiin oo dhan iyo isbedel ku yimid xataa suugaantii iyo wax kasta oo noloshooda khuseeyey. Maansadani waxa ay soo baxaday bishan May 27 , 2007, waana kan gabaygiiye ee iga hooya:

Adduunyada gabowdaye   dhowaan geeska dhigi doonta
Ee Guullihii soo askumay  goor horeba sheegay
Waa nimaan gu’ jirin maanta kii godol ka doonaaye

Haddii aynaan garanayn cilmiga   nala guddoonsiiyey
Ee nebigu gaadhsiiya yidhi  ummad gadaalkiin ah
Amuurahan gudbaayana   miyay inna garwaqsiinin

Dowlad guuna baa waxaa gembiyey  geel jir iyo tuuge
Garoomaha kuwii sidan jiruu  wiil yari gawracaye
Giiryaale fula’aa ka adag  geesi dirirtiiye
Taangi guuxayaa lagu qabsaday  gudumo daabkeede
Guunyada dadkii loo ogaa  caydh la galawleeye
Kuwaan geel lahaan jirin  horwayn gaar u foofsade e
Giinjaha dameer baa ka wacan  awrka goolka ahe


Laandheere gob ahaan jiraa  gaabshey luquntiiye
Oo kii ka gaabnaan jiraa  gaadhey meel sare e
Gabdhihii xishoon jiray  surwaal gaaban baw huya e
Wiilal baa intay dahab gateen  guudka loo dabaye
Gurboodkiyo haweenkii raggii gaalo ugu yeedhye
Guryihii ka saariyo rugtii  jeella loo geliye

Gobollaa dadkoodii la faray  inay ka guuraane
Haddii kale gumaad baa ku iman  gawrac loo tudhine
Daallin baa garsoor iyo la biday  talo go’aankeede

Rag baa haan garaacdoo na yidhi  gabayo weeyaane
Gamboolaydii loo diid iyo kuwii gaarka u lahaaye
Guddiyaaba loo xulay inay  gaadhka ka qabtaan
e

Xabashkii gumaystaha ahaa gacal walaalowye
Geeshkiisu waakaa fadhiya gumaradeenniiye
Ciddii aan gargaarkiisa  helin haad ku gabasleeye
Shantoo la isu geyn bay  labadii kala go’ doonaane

Wadaaddaa go’aansaday dagaal  geli colaadeede
U gaabsade suwaalkiyo guntiga  guul darriyo hooge
Goobihii xadrada loo ogaa  gaardi lagu dheelye
Guubaabo laga yeel wacdigii  loo golayn jiraye
Garbahana kitaab iyo tusbax  sooma geliyaane
Gamasyaaba lagu qaatay iyo gumuc rasaaseede
Bal dayaay aduunkaa ganbiyan  gebi dhaclayntiisa

Mar haddaanan dunideer gurracan  gees ka marahaynin
Ama aan dhul gaariyo la arag  gooni wax u yeelad
Oo gabanka aan dhalay tashigaa igu gargaaraynin
Waa inaan gawaan lama ordee  talo gorfeeyaaye
Gabagabana waa aniga iyo  ged iska sheegayga

Haddaan lay gabbaanadin caqligu  iga gawaan raacin
Ama aanan gees marin dadkii la iga soo gooyey
Oo dhalashadaydii u gelin  garacyo shaydaana

Wallee talo golaha aan ka go’in  uma caraad guuxo
Wallee dano u gooniya rag wada  daba guclayn maayo
Wallee diin gadaal nooga timid  hiil u geli maayo
Wallee dabin xariir lagu goglana  laygu gelin maayo
Luquntayda gaalleef rag sida  gooya odhan maayo

Wallee dowlad gaaraa la helay  layga gadi maayo
Wallee godob rag ii qaba hunguri  garab ku siin maayo
Wallee niman galbeedkaa u kacay  gabay ka dayn maayo
Wallee oday dadkiisii ka go’ay  guurti odhan maayo

Wallee geeri Soomaaliyeed  guul ka dhigan maayo
Wallee garabyadoodaa is jara  garow mid siin maayo
Wallee gacal xigaakii nin dilay   geesi odhan maayo
Wallee guriga ii xiga khalqiga  gaade kuma laayo
Wallee Xabashka soo galay arlada geel u qali maayo


Walee haanta gawgawda badan goorna tumi maayo
Walee haragga lagu soo gedfana  giija odhan maayo
Wallee gacanta igu taal mar qudha guudka kama saaro
Go’aankaygu waa kaa gartiyo gabaygu waa saase


Maxamed Hirad
San Diego California
E-mail:xagar2000@sbcglobal.net

Copyright 2007 Wardheernews.com