Gabaygan Aw Daahir (Xasan Daahir Aweys) Diid Nabad waxa uu daba socdaa mid hore oo uu tiriyay Dr. Cali Baxar. Waxa uu soo baxay bishii June 25 keedii, 2009.

Sida kan hore ee Dr. Baxar tilmaamayo waxa la yaab leh in qolyaha dagaal u joogga ah ee uu ka mid yahay hoggaamiyeyaashooda Xasan Daahir Aweys in aanay weli yaqiinsan dhibta ay dalka iyo dadka u geysteen, welina ku hayaan. Waxa iyana cajiib ah in weliba ay shacabka ka dalbadaan in dulqaad ay u yeeshaan sii socoshada dhibtaas iyo magac xumadaas. Bal adba isweydii ummadda la biday barakac, xasuuq, argagax, dawlad la'aan, sharaf xumo iyo masiibo adduun oo dhan, ee haddana kuwii dhibaatadaas oo dhan geystay ay ka codsnayaan dulqaad kale! Yaa lagu dhici lahaa arrintaas oo kale oo aan Soomaali ahayn? Waa yaabka yaabkiis!

Waxa iyana isweydiin mudan sababta ay dadku iskaga qaban la' yihiin nimankan u qalab qaatay dhibaataynta shacabkan dagaaladu ragaadiyeen, hortaaganna in laga soo doogto masiibadan Soomali ku habsatay. Waa arrin mucjiso ah oo weli ay badan oo shisheeye iyo Soomaaliba lihi ay ka dhursagayan. Tixdan gaaban oo haddaba qodobaas wax ka taabanaysa waa tan ee ku soo dhawaada:

1. Cali Baxar digriga uu akhriyey, daacadnimadiisa
2. Ilaahay ha daayee dabuub, diiran buu furaye
3. Dalililkii Quraankiyo sharciga, yuu ka daabacaye
   
   
4. Dacwad suuban Nebigaa la faray, Eebbe soo diraye
5. Deeq iyo dulqaad baa nafluhu, kugu daneeyaaye
6. Degenaanshahaa lagu helaa, daawo iyo khayre

7. Dilka iyo darraantana  khalqigu, waa ka didayaane
8. Ma dugaalsadaan kii dagiyo, daallin aan nixine
9. Talo debecsan baa lagu gartaa, muumin dowladehe

10. Hayeeshee dadkeennaa wakhtigan, doorsan oo falane
11. Dhegihii dalolaa wacdigu, doojinahayaaye
12. Qalbigii dabool saaran yahay, nuur ku duxiwaaye
    
    
13. Rag labaatan dayrood dabriyo, dirir u taagnaaday
14. Oo weli dantood gaadhin iyo, derejo loo dhiibo
15. Waa maxay dulqaadkay rabaan, ee dad wada yaabay!

16. Dirirtaa aan dhammaanayn madfaca, nagu diryaamaaya
17. Waagii dillaacaba shacbiga, lagu duqaynaayo
18. Maydadkaa dariiqyada bilqane, cidina duugaynin
    
    
19. Gawraca midkii door ahaa, laga diqoon waayey
20. Bamka diririgleeyee la dhigo, meel dad badan joogo
21. Dumarkiyo carruuraha dayaca, duurka wada jiifa
    
    
22. Dukundaakun ummadeer kol qudha, degelka loo qaaday
23. Ma shaydaan jinaa nagu dalbaday, duulkan na halaagay
24. Ma diintii islaamkaa ku tidhi, cadaw dadkiinnaa ah
    
    
25. Mise amar dambaa soo degoo, dabar go’een sheegay
26. Doc ka sheega xaajadan la dedey, hadal na deeqaaya
27. Dacwad kalana waa dood yaraan, idin dareensiiyey

27. Xasan Daahir doobnimo illaa, uu da’ sare gaadhay
28. Oo maduxu deebtaa yahoo, weli dakaamaynin
29. Dagaal oogid diin lagu gabado, reero lagu duulo
    
    
30. Duudsiga dad weynaha hantida, laga dawaareeyey
31. Degaanada la boobiyo guryaha, duul kale u meeray
32. Hadba doc u majiirkii wiglada, laba dublayntiisa
    
    
33. Waa damac kursoo uu ku dego, daarta caanka ahe
34. Mar haddaanu daynayn illaa, mawdku dabaq siiyo
35. Ka difaaciddiisii haddii, boqol kun daaduumay
    
36. Oo boqol kun oo kale dayaca , degey bannaan hawda
37. Oo boqol  kun doonayaha baddaa, bahal dafoo quuto
38. Caana daatay dabadood la qabay, dood horaa tidhiye
    
    
39. Bal inuu dalkeeniyo dadkaba, duug ka hadho maanta
40. Maa shiikhu goobtuu dalbaday, lagu dekaysiiyo
41. Maa salaan dirays ciidan lihi, ugu digtoonaado
    
    
42. Shacabkuna na daadihi dhahaan, nabadda doonaaya
43. Ama diida daandaasigoo, dowlanimo muuja
44. doqontaan dab qiiqii ka kicin, daaman leexsada e
45. Haddii kale dulqaatoo ku jira, debecsanaantiina

Maxamed Hirad  
E-Mail: xagar2000@sbcglobal.net
_________________________________________________________________________________

We welcome the submission of all articles for possible publication on WardheerNews.com
So please email your article today Opinions expressed in this article are those of the author
and do not necessarily reflect the views of WardheerNews
Maqaalkani wuxuu ka turjumayaa aragtida Qoraaga loomana fasiran karo tan WardheerNews 

Copyright © 2009 Wardheernews.com