Gabaygani wuxuu dabo socdaa labadii gabay ee ay kala tiriyeen abwaan Xuseen Cabdi Xalane iyo abwaan Maxamed Hirad. Sida kuwaa hore ayuu gabaygani wax ka sawirayaa foolxumada Soomaaliyi ku sugan tahay. Waxaan u arkaa in xalku yahay ku dhaqanka shareecada Islaamka oo keliya.

1. Xalanow Adduun doorsan baad deellay ii tirine
2. Dawo malaha Soomaalidaad doon isleedahaye
3. Waxaan carrabku ii daalinoon ugu dano seegin
4. Dalkeedaaba laga maamulaa darisyo shaydaane
    
5. Xaqaa laga durkoo beenti baa daabaceeda lehe
6. Doqonniimo lagu maag ninkii daacadda ahaaye
7. Dulli baana lagu faanay iyo daqar sokeeyaade
   
   
8. Dabo-dhilif wadani sheeganayaa xiray direyskiiye
9. Daljir baa inuu khaa'in yahay loo deldelayaaye
10. Wax caddaaladii lagu dirqiyay dab iyo baaruude
     
11. Indhahaa lasoo duubtayoo la'is dar jiidhsiine
12. Dariiqaana laga baydhayaa duur la xulayaaye
13. Nafta doy ibleys ugu rid baa loo diyaar yahaye
     
14. Waxaa duhur la ceebeynayaa diric xalaaleede
15. Daydaygiyo mooryaanki way darajadeesmeene
16. Danbi ayaaba lagu qeexayaa daahir aan jirine
     
17. Ma daryeelo keenii cilmiga daah furkow galaye
18. Ninkii doollar yar caaqilada daanka uga buuxsha
19. Dumarkiyo Carruurtuu dhiciba daaci ku ahaaye
     
20. Waa dayro maatida kuwii daadaheyn jiraye
21. Ducfi baa hoggaan laga dhigtoo doorashaan imane
22. Damiir laawihii baa xukuma daynta wayn qabaye
     
23. Dib udhugo bal taariikhdu waa shay dabiiciyahe
24. Darwiishkii Ismaaciil markuu dulaha miiqaayay
25. Dux hayeelan waa waanaduu dirayay maantaase
26. Daannada Islaamkoo dhanbaa diib laguu marine
     
27. Inkastood difaacdood halkii daganba meelayso
28. Nin dac yidhi koluu awgayow ciilba u dilaaco
29. Si unbuu mindhaa uga dusi dayrki loo xidhaye
     
30. Haddaan dulucda hadalkiyo murtida idin dareensiiyo
31. Duco iyo waxsheeg iyo hadduu daaya ku abaado
32. Dadka geeri kama baajin karo ruux dadaal yidhiye
     
33. Dibindaabyadii lagama dayn Dabec hasheeniiye
34. Danbarkeeda niman baa ku lumay foolna way dihane
35. Midka haatan sii doojin ee dawliska u qaatay
36. Ee doobka wayn sii cushey dacari haysaaye
37. Hadday iyadu daafaha ka lulan dalawyadii baaska
38. Asay duulba duul ugu sidkeen doorkan waa qalo'e
     
39. Inay nabadi door tahay siday doodu ugu joogto
40. Ayaa loo durbaan tumi colaad duug mareebta ahe
41. Doc kalaaba laga qaawin tay dada lahaayeene
     
42. Laba daran midkaad doorataa dooqu jilayaaye
43. Dumaal adiga kuu muuqan iyo doqon walaalkaaya
44. Midna lagama daw helo intaad dunida joogtaaye
     
45. Raggu ways dilaa ceebse waa laga diqoodaaye
46. Soomaalidaandardaranee shaxdii daaqilka ujiifta
47. Dam inay tiraahdoo carrada laguba soo duugo
48. Dastuurkuu Axmaarku u dhigaa iiga sii darane
     
49. Intase caasi daar iyo ku jiro doho la waageeray
50. Ee shayga damaciisa gala dibada keenaayo
51. Innana aan damaashaadka iyo doollar bixinayno
52. Kollaba inaynu wada diirsanaa haw daniyin dheexe
     
53. Inta daaqad nagu furan markaan yaraha daymoodo
54. Imtixaan da'weyn baa jiriyo xaajo daalacane
55. ILaahay dulbadanaa miyaan hadalka loo daynin
     
56. Haadka Samada duuliyo markii diinka lagu heesay
57. Iyaguba dariiqii Alley calaf ku dooneene
58. Anna yaanan sii daramaleyn dagani waa quuse
     
59. Dawgii Islaamkiyo haddaan Diinta Nabi hayno
60. Rabbi baan dammiin uga hayaa yaan la dacaroone
61. Waa la doogidaasaa qalbigu diirsamaad yahaye.

Mubahir Sh. C/llaahi
Leicester, UK
E-Mail:Mubashir506@hotmail.com
________________________________________________________________________

We welcome the submission of all articles for possible publication on WardheerNews.com So please email your article today Opinions expressed in this article are those of the author and do not necessarily reflect the views of WardheerNews
Maqaalkani wuxuu ka turjumayaa aragtida Qoraaga loomana fasiran karo tan WardheerNews 

Copyright © 2009 Wardheernews.com