Maansadani waxa ay ka hadlaysaa sida magacii suubbanaa ee diinteenna Islaamka loo baaba'shay. Haybaddii Islaamka waxa maanta laga dhigay ama ay iska noqotay orgi harag shabeel xiran. Waxa illaa hadda lagu wareersan yahay ujeeddada dhabta ah ee kooxaha Soomaaliya ku dagaalamayaa ee ay maatida u laynayaan amaba laba wajiilenimada dadka qaarkii. Taas oo uu gabaygani ku salaysan yahay. Waxa aan curiyay gabaygan bishan May 7 deedii, waana kan ee iga hooya.  

Waxa shacabka loo laynayaa waa sharuud adage
Umaddii shuftaa lagu diroo shuush horlaa galaye
Shantii meel istaag taba labaa lagu shahiidaaye
 
Shilka iyo geeridu ka badan shiil-castii gubane
Shabi oo jaf mooyee la waa sheeko nabadeede
Shaqaaqooyin kaasaa la tagay sharaftii Soomaale
 
Mooryaan shabaab ahi kolley sheexi mahayaane
Inkastoon shareecada arkiyo shuqul wadaadeynta
Shayaadiin hubaysani ninnaba uma shafeeceene 
 
Shifo malaha gabaygaan haddeer shaaci leeyahaye
Shidaal baa dab la isugu dariyo shaabo xaabo ahe
Anna shamac aan duugoobin baa laygu shidayaaye
 
Afartaa runtii oo sharraxan shaqalladeedii dheh
Ragga shiribka laga soo xigtiyo shaacir hadalkii dheh
 
Wax Shariifku noo dhiga hayaa showgii gaalada'e
Adduunyadan shartiyo beenta iyo shaamarreer badatay
Waa wuxuu nin sheekh ihi dulmiga uga shaqeeyaaye
 
Waa waxa sharciga Eebbahay loo shakiyayaaye
Raggii Xamar ku shiray haatanay dib u shallaayeene
Nin shirqool walaalkii u dhigay sharadku waw yiile
 
Waa waxaa shisheeyihi u rogay duul shuraako ahe
Shaxshax bay qosleen Nato iyo odaygii shaydaane
Shansho iyo tagoogaba kajabe ha i shideeyeene

Orgi harag shabeel xiran ninkii shiishay ku hungowye
Shaqsi iyo jameecaba la doon shilinki waallaaye
Muslmkii shaxaad buu galbeed ugu shiraayaaye
 
Afartaana runtii oo sharaxan shaqalladeedii dheh
Ragga shiribka laga soo xigtiyo shaacir hadalkii dheh
 
Soomaalidii shakaalkaa ugo'ay sheeda caynka ahe
Haddaan shaac madow iyo qalbiga shilal lagaa saarin
Shaxda qaabka loo dagay wataa shiilan gacalkay'e
 
Shufeer jiibta fuuliyo adoo shaybe madaxii leh
Oo qori shilke ah saaranoo shalay wax boobaaya
Dadku shaahid buu kuu ahaa meel shineemo ahe
 
Maantana hadduu sheeliyoo shuufo dhaqankaaga
Sharabaado dacas loo xirtiyo shulug la siii daayay
Shuqul xumada kii kugu yiqiin wuu shakiyayaaye
 
Ninkii shaqo ka tagaa meel kaluu shaah ka cabayaaye
Adiguna shafkii baad tahoo shaabbad lagu saarye
Maxaad diinta iigaga shuqeyn shaani baad tahaye

Mubashir sheekh C/laahi
E-Mail:Mubashir506@hotmail.com