U Hanqaltaag Hadimo

Maansadan waxa la yidhaahdaa U Halqal Taag Hadimo. Waxa ay soo baxday May 19, 2007. Waxa ay jawaab u tahay maanso uu curiyay Ibraahin Hawd oo bilow u noqotay silsiladda loogu magac daray Haan ama Heeryo oo weli socota. Ibraahin waa nin aanan aqoon u lahayn, hayeeshee aan qoraaladiisa ku iqiin afkaar Soomaalinimo. Waxa maansadiisu hadda i gelisay tuhun ah in Ibraahin u xuubsiiban rabo in uu noqdo Dagaal Ooge. Taas oo aan jecelahay in aan ka horjoogsado. Maansadiina waxay tidhi:

Nin hamiyey habeenkii
Hurdadii ka haayiray

Hugun iyo is hiif galay
Halkuu talo ku soo hooyo

Waa hadaf u dhaabada.

Hilinkuu ku toosana
Waa naartii haawiya

Ama waa hanuun Eebbe

Janno hoyga uga dhigay

Dadkuna ku haaraamo

Ama ku hambalyeeyaan

Hawdow walaal heedhe
Somaaliweyn ku hirad kii
Suugaan kala hufkaagii
Maqaal wacan habayntii
Idaajaa u hanjabkaagii
Ma haadaad habowdoo
Colaad aad humaysiyo
Jabhadihii hore sidoodii
Hiyi kicisay shacabkoo

Maanso haw la soo tidhi

Ma dabkii huraayee
Soddon sano holcaayaad
Markuu hoos u soo dhacay
Halaskiyo dhuxuluhii

Soo hullaaqin doontaa?

Hawdow walaal heedhe
Waadigan hub qaadee
Maal iyo naftaba huraye
Dadba hadduu heddaa yahay
Oo hayb midkii kuu xigay
Aad hadhide halaag leeyahay
Yaad ugu horraynoo
hootadu ku dhici maanta?

Ma Riyaalahan halyayga ah
Hawd iyo waqooyiba
dhammaan wada hantiyo raba
Miyaad hor istaagi doontaa?

Ma axmaarkan hiilkiis
Loo kala hormarayee
Kii soo haaban waayana
Ku dhacayso haadaad
Ku  haliili doontaa?


Ma qaarkeer hamuun qaba
Kursigaas hankaabkiis

Ina hebel waraabiyo                                                                                             siilaanyahan hingilan cadho
Ayaad Ku halaag isleedahay?

Ma Hartigan hurdada dheer
Hebidnimo daraadeed
Habqankoodu kala lumay  
guluf lagu hogaan baro

Ku hillaacin doontaa?

Mise diin hub wadatoo
Dhul fog laga hoganshoo
Mooryaan loo hadoodilay
Hud hud iyo qabyaaladi
Hoosta ka xukumaysoo
Dadba aan hambaynayn
U hogaansan tahayoo
Hoobiyaha la ridaysaa?

Mise heegan baad kicin
Hawiyahan is jaray baad
Hiil qaar u noqonoo
Habar Gidirta Cayr baad
Ku hagoogan doontaa?


Adduunyadan halaaga ah

Dadba heegan ugu jiro

Nafta la harjadkeedii
Qof kastoo dab hurin iyo

Hadimiyo dhib soo wada
Waa horror ibliisoo
Na hanuunsan maayaan !

Hawdow walaal heedhe
Hawlaha dhabta ah weli
Hoos uguma daadegin
Ha yeeshee wixii hadhay
Heestu nooma fiicnee
Sidii hanadaddii hore
Gabay loo horseediyo
Hadhow baan la sugayaa


Maxamed Hirad
San Diego California
E-mail:xagar2000@sbcglobal.net

Copyright 2006 Wardheernews.com