Kismaayo ( WDN) – Ergo ka kooban 300 oo ku sugnaa Xarunta Caymiska ee magaalada Kismaayo, ayaa maanta cod u qaaday Qabyo-qoraalka Dastuurka Jubbaland, iyadoo ergadu ay cod aqlabiyad ah ku Ansixiyiin Dastuurka Maamulka Jubbaland.
Xafladdii ansixinta Dastuurka Jubba ayaa, waxaa goobjoog ka ahaa Wasiirka Dastuurka Dowladda Federaalka ah ee Soomaaliya Xuseen Sh. Maxamuud, R/Wasaarahii hore ee Soomaaliya Cali Maxamed Geedi, Wasiirkii hore ee Warfaafinta Soomaaliya, Cabdullahi Ciilmooge, Wakiilka IGAD ee Soomaaliya Maxamed Cabdi Afeey, Wasiirkii hore ee Tacliinta maamulka Puntland Cali Xaaji Warsame, xubno kasocday UNDP iyo martisharaf kale.
Ansixinta dastuurka kaddib, waxaa madasha ka hadlay mas’uuliyiin kala duwan, kuwaas oo bogaadiyay qaabka ay u dhacday munaasabaddii ansixinta Dastuurka, iyagoo sheegay inay tahay tallaabo horumar leh oo ay gaareen shacabka iyo maamulka Jubbaland.
Wakiilka IGAD ee Soomaaliya Maxamed Cabdi Afey oo khudbad dheer goobta ka jeediyay, ayaa sheegay in ansixinta dastuurkan Jubbaland ay tahay tallaabadii ugu danbeeysay ee heshiiskii Addis Ababa ee dowladda Somaaliya iyo maamulka Jubbaland.
Md. Afey ayaa sheegay in ka IGAD ahaan ay cadeeynayaan in maamulka Jubbaland uu gabi ahaanba kasoo baxay heshiisyadii uu la galay dowladda Soomaaliya, uuna filayo in doorashadu madaxtinimo ee maamulka ay ku dhacdo xilligii lagu balamay.
Md. Cali Maxamed Geedi, ra’iisul wasaarihii hore ee Soomaaliya oo isna goobta khudbad dheer ka jeediyay, ayaa sheegay in Soomaaliya ay gashay marxalad ka badalan tii hore, isagoo xusay in ansixinta dastuurkan ay tahay tallaabo wax ku ool ah. Waxa uuna kula dardaarmay maamulka Jubbaland in had iyo jeer uu ka shaqeeyo sidii loo qancin lahaa cid walba oo wax tabaneeysa.
Guddoomiyaha Baarlamaanka Jubbaland, Sheekh Cabdi Maxamed C/raxmaan oo isna ka hadlay xafladdii maanta ayaa sheegay in heshiiskii Addis Ababa uu qorayay in waqtiga maamulka KMG ee Jubbaland uu ku eg-yahay dabayaaqada bishan Ogoosto, Wuxuuna Xusay in Doorashadu ay dhici doonto 15-ka bishan Agoosto.
Wasiirka Dastuurka dowladda Soomaaliya, Xuseen Sh. Maxamuud oo isna goobta ka hadlay ayaa xusay inuu soo dhaweeynayo dastuurka ay maanta ansixiyeen ergada reer Jubbaland, isagoo goobta ka sheegay in dowladda Soomaaliya ay dadaal ugu jirto sidii la isugu soo dhaweyn lahaa maamul goboleedyada iyo dowladda dhexe ee Soomaaliya.
Ugu dambeyn, Madaxweynaha Jubbaland Sh. Axmed Max’ed Islaam (Axmed Madoobe) oo khudbad dheer munaasadda ka jeediyay, ayaa ugu hambalyeeyay ergadii ka kala timid seddexda gobol, guddiyadii ka shaqeynayay dastuurka iyo cid walba oo ka qeyb-qaatay sidii loo qori lahaa dastuurka Jubbaland.
Cabdicasiis Maxamuud ( Garyaqaan)
Kismaayo, Jubbaland
We welcome the submission of all articles for possible publication on WardheerNews.com. WardheerNews will only consider articles sent exclusively. Please email your article today . Opinions expressed in this article are those of the author and do not necessarily reflect the views of WardheerNews.
WardheerNew’s tolerance platform is engaging with diversity of opinion, political ideology and self-expression. Tolerance is a necessary ingredient for creativity and civility.Tolerance fuels tenacity and audacity.
WardheerNews waxay tixgelin gaara siinaysaa maqaaladaha sida gaarka ah loogu soo diro ee aan lagu daabicin goobo kale. Maqaalkani wuxuu ka turjumayaa aragtida Qoraaga loomana fasiran karo tan WardheerNews.
Copyright © 2024 WardheerNews, All rights reserved
